نیویورک شهریآمریکا بیرلشمیش ایالتلرینین اهالی باخیمین‌دان ان بویوک شهری‌دیر. عئینی آدلی نیویورک اوستانینده یئرلشیر و دونیانین ان اهمیتلی ایقتیصاد و تیجارت مرکزلریندن بیری‌دیر. شهر، مدیا، سیاست، تحصیل، اَیلنجه و موداداکی دونیالیق نقشینه گؤره، دونیا شهری اولاراق قبول ائدیلمکده‌دیر. بیرلشمیش میلتلر تشکیلاتینا ائو صاحیبلیگی ائتدیگیندن خاریجی ایرتیباط‌لار اۆچون ده چوْخ اهمیتلی بیر مرکزدیر.
نیویورک شهری بئش حیصه‌یه آیریلمیشدیر: منهتن، بروکلین، کوینس، برونکس و ستاتئن-آیلند. ۸۳۰ کیلومترلیک بیر ساحه‌ده یاشایان ۸٬۲ میلیون اهالیسی‌ایله نیویورک، آمریکادا ان بویوک اهالی سیخلیغی اولان شهردیر. شهر اطرافی‌ایله بیرلیکده نیویورک مئتروپولونون اهالیسی ۲۱ میلیون نفره چاتیر.
نیویورک کؤچریلر شهری‌دیر. شهرده تخمیناً ۱۷۰ آیری دیل دانیشیلماقدادیر و هر اۆچ آدامدان بیری آمریکادان ائشیکده دونیایا گلیب. اینگیلیسجه موختلیف آغیزلار دانیشیلیر. اینگیلیس دیلی‌ایله یاناشی ایسپانیا دیلیده گئنیش یاییلمیشدیر. کیچیک ایتالیا(Little Italy) محله‌سین‌ده ایتالیاجا، چین محله‌سین‌ده‌ایسه چین دیلیده دانیشیلیر.
نیویورک بیر چوْخ آمریکان مدنی حرکاتی‌نیندا دوغوم یئریدیر. ادبیات و ویرچوال صنعتلرده هارلئم اینتیباهی، شکیلده موجررد ائکسپرئسسیونیزم (نیویورک مکتبی)، موسیقیده هیپ-هوپ، پانک، سالسا و تین پان آللئی بۇ حرکات‌لاردان بعضیلریدیر. ۲۴ ساعات آچیق‌اولان مئتروسو و سیخ نقلیاتی‌ایله «هئچ واخت یاتمایان شهر» آدینی آلمیشدیر.
آزادلیق هئیکلی، امپایر ایستئیت بیناسی، سنترال پارک و تایمز مئیدانی، موعاصیر اینجه صنعت موزه‌سی، قوگگئن‌هایم موزه‌سی و موعاصیر تاریخ موزه‌سی، شهرین ماراقلی مکان‌لاریدیر. گوی‌دَلَنلری، پروسپئکتلری، رئستورانلاری، آلیش-وئریش مرکزلری و اینسانلاری ایله نیویورک توریستلری جذب ائتمکده‌دیر.
