|
A Little Pond
A Little Pond (Hangul: 작은 연못; RR: Jakeun yeonmot) zo ur film brezel-drama Sukorean embannet e 2009 skrivet ha sevenet gant Lee Saang-woo. Ar film a gont darvoud lazhadeg repuidi sukorean gant soudarded stadunanat e No Gun Ri e fin miz Gouhere 1950, e-penn kentañ Brezel Korea. An holl aktourien o deus bet c'hoariet a youl vat, e-touez anezho reoù brudet-mat er sinema sukorean. Savet eo bet ar senario diwar testenioù tud hag a oa chomet bev goude al lazhadeg a oa bet e No Gun Ri. En desped da-se an holl dudennoù a zo bet ijinet. IstorKregiñ a ra ar film gant un devezh boas en ur gêriadennig korean o vevañ doare mod kozh. Ar vugale a vez o c'hoari, ar gwazed a vez astennet tro-dro da c'hoarioù taol. Ur c'helnner yaouank a vez o teskiñ ur ganaouenn d'ar skolidi evit kanañ anezhi e-pad ur sonadeg. Siwazh dezho an talbenn hag a oa pell dioute abaoe sizhunioù ma oa krog Brezel Korea a erru trumm gant ma vez al lu sukorean o kilañ bountet kreñv gant nerzhioù Norzhkorea. Ar Stadoù-Unanet Amerika n'o devoa ket kaset soudarded a-walc'h o tont eus Japan evit harpañ Su Korea. Gant ma oa an difennerien o kilañ, lod eus ar soudarded stadunanat a roas an urzh da annezidi ar gêr da dec'hout kuit war-zu ar su. Tro 500 anezho a varvas war hent an harlu. |
|||||||||||||||||||||||||||||||||||||
