«Act Naturally» (з англ. — «Грай натуральна») — песня, напісаная амерыканскім аўтарам і выканаўцам Джоні Расэлам^[en] (прыпісана яму і Воні Морысан). Упершыню песня была выканана амерыканскім выканаўцам Бакам Оўэнсам і яго гуртом The Buckaroos^[en] у 1963 годзе; іх версія заняла першую пазіцыю ў амерыканскім чарце Billboard Country Singles^[3]. Песня знакамітая многімі кавер-версіямі, у тым ліку і версіяй гурта «The Beatles», якая выйшла на альбоме Help!. У 2002 годзе песня заняла 169 пазіцыю ў спісе 500 найвялікшых кантры-песень паводле сайта About.com^[4]. У 2024 годзе Rolling Stone змясціў песню на 70-е месца ў сваім рэйтынгу 200 найвялікшых кантры-песень усіх часоў^[5].

Ідэя напісаць гэтую песню ўзнікла ў Расэла пасля таго, як ён быў запрошаны адным са сваіх сяброў паўдзельнічаць у студыйнай сесіі ў Лос-Анджэлесе. На пытанне сваёй тадышняй сяброўкі, навошта яму трэба ехаць у Лос-Анджэлес, Расэл адказаў: «Яны збіраюцца ўставіць мяне ў свае фільмы і зрабіць з мяне вялікую зорку». Такое тлумачэнне было ўспрынята з гумарам^[6], а самому Расэлу адразу ж прыйшла ідэя напісаць песню, заснаваную на гэтым каментарыі. Песня была напісана ў той жа дзень, аднак запісаць яе не ўдалося: тадышні прадзюсар Расэла заявіў, што песня пра фільмы — гэта не хітовы матэрыял^[6].

У 1963 годзе Расэл супрацоўнічаў у напісанні песень з Воні Морысан, якая працавала таксама з выканаўцам Бакам Оўэнсам з Бакерсфілда (Каліфорнія). Калі Расэл найграў песню Морысан, яна палічыла, што тая цалкам падыдзе для Оўэнса, і ўзялася перадаць яму запіс песні. Паколькі яшчэ не было зроблена ніводнага запісу, а Расэл меў дамоўленасць з Морысан пра тое, што аўтарскія правы на песні дзеляцца паміж імі пароўну, ён уключыў яе ў сааўтары, хаця яе роля заключалася толькі ў тым, што яна перадала песню Оўэнсу^[6].

Самому Оўэнсу песня спачатку не спадабалася, аднак пад уплывам Дона Рыча (удзельніка яго гурта) ён неўзабаве змяніў сваё меркаванне. Песня была запісана ў студыі Capitol Records 12 лютага 1963 года, сінгл з песняй выйшаў 11 сакавіка^[7]. 13 красавіка песня ўвайшла ў чарт Billboard Country Singles, а 15 чэрвеня песня пратрымалася на яго вяршыні свой першы тыдзень. Усяго песня фігуравала ў чарце 28 тыдняў і зрабіла з Расэла сапраўдную зорку — да канца 1960-х яшчэ 19 яго песень займалі лідарскія пазіцыі ў хіт-парадах^[8].

Удзельнікі гурта «The Beatles» перапелі песню ў 1965 годзе для свайго альбома Help!. Песня ўвайшла толькі ў брытанскую версію альбома, тады як у ЗША песня выйшла на баку Б сінгла «Yesterday»^[9]. У сакавіку 1966 года песня была выпушчана таксама на брытанскім міні-альбоме Yesterday. Яшчэ пазней (у ліпені 1966 года) песня ўвайшла таксама ў амерыканскі альбом Yesterday and Today.

Песня была запісана 17 чэрвеня 1965 года за 13 падыходаў; першыя 12 дубляў у далейшым выкарыстоўваліся толькі для ўзбагачэння аранжыроўкі, базавым паслужыў трынаццаты дубль, адзіны, выкананы з вакалам. Мікшыраванне было праведзена на наступны дзень. Вакальную партыю выканаў Рынга Стар, яму ж належыць і партыя ўдарных; Пол Мак-Картні выконваў падгалоскі і партыю бас-гітары; Джон Ленан выканаў партыю рытм-гітары, а Джордж Харысан — партыю сола-гітары, якая была запісана двойчы і зведзена ў адну.

Гурт выконваў песню на «Шоў Эда Салівана», якое было запісана 14 жніўня 1965 года і выпушчана ў эфір 12 верасня^[10].

У 1989 годзе Оўэнс і Стар запісалі сумесную версію песні, на якую быў зняты бесклапотны кліп, у якім абодва выканаўцы ўяўлялі, нібыта яны здымаюцца ў нейкім вестэрне ў ролі каўбоеў. Гэтая версія песні дасягнула 27 пазіцыі ў чарце Billboard Country Singles, дзе пратрымалася ўсяго 11 тыдняў^[11]. Песня была намінавана на некалькі прэстыжных узнагарод (у тым ліку «Грэмі» за «лепшую вакальную супрацу»), аднак ніякіх прыкметных адзнак не атрымала.

• Тэкст песні «Act Naturally»Архівавана 16 лютага 2015. (Праверана 15 студзеня 2015)
• Біблія «Бітлз» — Act Naturally (Праверана 15 студзеня 2015)