Fabiana P. Arejola

Si Doña Fabiana Padilla Arejola ( ? - Hulyo 25, 1946) sarong prominenteng pilantropo asin dakulang taga-andoyog kan Simbahan Katoliko Romano sa diocesis kan Caceres. Siya nagin presidente nin pirang beses kan Our Lady of Penafrancia Association.

An mga magurang niya iyo sinda Antonio Arejola asin Emeteria Padilla. Tugang niya sinda Leoncio na nagin padì, an politikong si Tomas, an rebolusyonaryong si Ludovico, asin sinda Encarnacion asin Dolores. Duwang beses nakaagom, enot sa sarong nag'aapelyidong Mapa asin pakabalo napangagom siya ni Celedonio Reyes. Alagad, mayò siya nag-akì.

Kan panahon na an saiyang tugang si Ludovico sarong Heneral na an tropa kaini hustong nakikipagpolpogan laban sa mga Amerikano, siya nadamay sa aktibong pagtabang ta siya kaapil sa Damas Benemeritas de la Patria, sarong grupo na nag'aasikaso sa pagtaong pagkakan asin pagbulong sa mga Filipinong soldados.^[2]

Bilang sarong socialite asin kaapil sa alta sociedad kan syudad nin Naga, siya nagin harani sa mga darakulang personahe kan Simbahan asin parati damay sa mga sibot kaini. An mga pagitiripon kan mga opisyales kan Simbahan parati ginigibo sa saiyang dakulang harong na dati yaon namomogtak sa kanto kan Kalye P. Burgos asin Kalye General Luna. Palibhasa daing aki saiyang pigdonaran nin mga darakulang lote asin kaomahan an Obispado nin Caceres.

Kan siya magadan, an pamilya Arejola, sa katogotan ni Arsobispo Pedro Santos, nagpatogdok nin mausoleo na alabes nagsisirbeng kapilya sa laog mismo kan kamposantong katoliko nin Peñafrancia na ipigngaran ki Fabiana. Sa mausoleong ini nakalubong asin natitipon an restos niya, kan saiyang ama si Antonio, an tolo niyang tugang na si Tomas, Ludovico, asin Leoncio, asin kan saiyang agom na si Celedonio Reyes. An kinontratang magtogdok kan mauseleo iyo idtong bantogan na iskultor na si Federico Barcinas. ^[3]

3.Osipon asin saysay ni Gg. Fabiana Arejola, curator kan Museo del Seminario Conciliar de Nueva Caceres Sept. 23, 2012

Sarong tamboan an artikulong ini. Makakatabang ka sa Bikol Wikipedia sa pagpoon kaining pahina.