Pluvivo, supervivo, transvivo, aŭ postvivo estas daŭra vivado malgraŭ danĝeraj kondiĉoj. Metafore ĝi ankaŭ estas aplikebla al la pludaŭro de nevivaj estaĵoj kaj abstraktaj ideoj. Vivantaj organismoj kutime havas genetike programitan pluvivemon, kaj artefaktoj analoge estas dezajnitaj por minimuma detrueblo.

En religia kunteksto, "pluvivo" povas signifi la postmortan pluekziston de homa konscio, ofte konceptata kiel animo aŭ spirito. Ĝi estas rigardata kiel sinonimo de "senmorteco", sed havas malpli bonajn konotaciojn.^[1] La 17a-jarcenta kristana filozofo Tommaso Campanella kunligis la ordinaran kaj la religian sencon de pluvivo, argumentante homcentrisme ke ĉiuj bestoj havas animon, sed nur homoj havas menson, kiu ebligas pluvivadon per ekspluato de la natura mondo kaj ankaŭ estas la sola afero, kiun Dio pluvivigas post la morto.^[2]

Diversaj verkoj rilatas al pluvivado. Kaj fikciaj kaj malfikciaj rakontoj pri individuoj, kiuj transvivas danĝeregajn cirkonstancojn, estas popularaj. Ekzistas granda amaso da edukaj verkoj, nomeblaj kiel transvivgvidiloj, kiuj konsilas pri naturmedia vivokapablo (d) en danĝeraj situacioj kiel perdiĝo sen nutraĵo kaj akvo, pri sindefendado, kaj pri transvivado de naturkatastrofoj.

Ĉe videoludo ludata en pluvivada agordo, la ludanto devas ludi seninterrompe kiel eble plej longe sen morto dum la ludo prezentas ĉiam pli malfacilajn defiojn.^[3] Varianto de pluvivada agordo estas agordo, kie la ludanto devas transvivi ĝis certa dauro, post kiu li aŭ ŝi venkas.^[4] Tiu agordo estas aparte ofta ĉe turdefendaj videoludoj, en kiuj la ludanto devas plibonigi specifajn defendajn strukturojn por forteni malamikon kiel eble plej longe.^[5] Pluvivada agordo similas al la tipa ludostilo de la klasikaj arkadaj ludoj (d), en kiuj ludantoj bataladis kontraŭ ĉiam pli fortaj malamikaj atakoj.^[6] Tiu stilo estis celita por ke la ludo finiĝu rapide kaj lasu ŝancon ludi al aliaj ludantoj.

1. ↑ Peter Moore, Where are the Dead?: Exploring the idea of an embodied afterlife (2016). p. 10.
2. ↑ Muratori, Cecilia. 2013. "Eating (Rational) Animals: Campanella on the Rationality of Animals and the Impossibility of Vegetarianism." En Muratori, Cecilia, kaj Dohm, Burkhard (red.), Ethical Perspectives on Animals in the Renaissance and Early Modern Period. Firenze: Sismel - Edizioni del Galluzzo. 160.
3. ↑ Glasser, Aj (15-a de oktobro 2008) Gears of War 2 – Horde Mode Is The Way To Go. Kotaku. Arkivita el la originalo je 17-a de oktobro 2008. Alirita 18-a de novembro 2011 .
4. ↑ Rodgers, Scott. (2010) Level Up!: The Guide to Great Video Game Design. John Wiley and Sons.
5. ↑ Walker, John (5-a de majo 2009) The Plants Vs. Zombies Review. Alirita 18-a de novembro 2011 .
6. ↑ Osborne, Joe (11-a de oktobro 2011) Empires & Allies Survival Mode: Everything you need to know. Games.com. Arkivita el la originalo je 2011-11-22. Alirita 18-a de novembro 2011 .