D Verena «Vreni» Spoerry-Toneatti (* 8. Meerz 1938 z Züri; † 29. Mai 2025; haimetberäächtigt z Fischetaal) isch e Schwyzer Bolitikeri (FDP gsii.

D Spoerry isch z Rapperschwiil ufgwagse. No dr Handelsmatuura het si Räächtswisseschaft studiert un mit em Lizänziaat abgschlosse. Si isch ghyroote gsii, dreifachi Mueter un het z Horge gläbt. Ire Grooßvater isch anne 1870 as 16-Jeerige vu Udine, Italie in d Schwyz chuu go am Böu vum Gotthardtunäll mitzschaffe; är het speeter d Böufirma Toneatti grindet.^[1]

D Spoerry isch Bresidänti vum Stiftigsroot vu «Esprix», ere Stiftig, wu unternämerischi Laischtig uuszaichne duet, un Bresidänti vum Stiftigsroot vu dr Kaspar Spoerry-Stiftig, ere Stiftig fir d Feerderig vum Behindertespoort, gsii. Derzue isch si vu 1992 bis 2004 Bresidänti vum Energyfoorum Schwyz gsii.

Ab 1986 isch d Spoerry langjeerigi Verwaltigsreeti bi dr Schwyzerische Kreditaaschtalt (SKA) bzw. dr Credit Suisse (CS) gsii, vu 1986 bis 1996 bi dr Züri Versicherig,^[2] vu 1992 bis 2004 bi dr Nestlé un vu 1988 bis 2001 bi dr Swissair.^[3] Vu 1999 bis 2010 isch si Viizebresidänti vum Verwaltiugsroot vu dr SV Group gsii. Vu 1985 bis 2004 isch si derzue au Mitgliid un Viizebresidänti vu dr Zürcher Handelschammere gsii.

Si isch am 29. Mai 2025 im Alter vu 87 Joor gstoorbe.^[1]

Voor iire bolitische Laufbaan uf nazionaaler Eebeni isch d Spoerry Gmaireeti (1978–1986) z Horgen un Zürcher Kantoonsreeti (1979–1983) gsii. Vu 1983 bis 1996 het si em Nazionaalroot un vu 1996 bis 2003 em Ständeroot aagheert.

Im Nazionaalroot isch si in dr Kummissioon fir Räächtsfrooge (1995/96), im Ständeroot in dr Kummissioon fir soziaali Sicherhait un Gsundhait (1997–2003), in dr Kummissioon fir Umwält, Ruumblaanig un Energy (1996–2003), in dr Kummissioon fir Wiirtschaft un Abgaabe (1996–2003) un in dr Staatsbolitische Kummissioon (1996–1999, Bresidänti 1997–1999) gsii.

• Constantin Seibt: Der Swissair-Prozess. Echtzeit, Basel 2007, ISBN 978-3-905800-04-3.

 Commons: Vreni Spoerry – Sammlig vo Multimediadateie

• Vreni Spoerry uf dr Websyte vo dr Bundesversammlig (Iigreichti Vorstöss)
• Privatarchiv Vreni Spoerry in dr Archivdatebank vom Schwiizerische Bundesarchiv

• Porträt Vreni Spoerry. Video, SRF.ch, Schweiz aktuell, 25. Mai 1992.

1. ↑ ^{1,0 1,1} Ruedi Baumann: Nachruf auf Vreni Spoerry: Sie war die mächtigste Wirtschaftsfrau der Schweiz. In: Tages-Anzeiger. 2. Juni 2025, abgruefen am 2. Juni 2025. 
2. ↑ Vreni Spoerry, erste Verwaltungsrätin der Zurich, Website der Zurich Versicherung, abgerufen am 2. Juni 2025.
3. ↑ Vreni Spoerry: «Ich lief Gefahr, angespuckt zu werden». In: Tages-Anzeiger. 12. Oktober 2020, abgruefen am 2. Juni 2025. 

Dä Artikel basiert uff ere fräie Übersetzig vu dere Version vum Artikel „Vreni_Spoerry“ vu de dütsche Wikipedia. E Liste vu de Autore un Versione isch do z finde.