D Voli Geiler (* 18. Novämber 1915 z Winterthur; † 11. Novämber 1992 z Züri; haimetberäächtigt z Bürgle TG) isch e Schwyzer Theater- un Filmschauspiileri un Kabarettischti gsii.

D Geiler het z Züri Haute Couture gleert un näbehäär an dr Schauspiil- un Danzschuel vum Rudolf von Laban privaate Schauspiil-, Gsangs- un Danzunterriicht gnuu. Eerschti Ufdritt het si 1935 un 1936 am Summertheater Winterthur un 1936 bim Cabaret Bäretatze Bärn ghaa. Derno isch si uf Paris gange un het deert Haute Couture un Kosmeetik gleert. Vu 1938 bis 1946 isch si Mitgliid vum Cabaret Cornichon gsii, wu si ire speetere Bihnepaartner Walter Morath chänngleert het. 1946 un 1947 isch si mit dr Danz- un Pantomime-Druppe vu dr Trudi Schoop dur Amerika tuurt. Anne 1948 het mer si zäme mit em Werner Finck, dr Olga Gebhardt un em Karl Meier im Brogramm vum Cabaretistische Theater Nebelhorn im Zürcher Hirsche chenne sää. Im nämlige Johr het si ire eerscht Ufdritt mit em Morath (Programm für zwei) im Embassy z Züri ghaa. Bis 1970 isch s Duo mit e Hufe Brogramm ufdrätte, dodrunter A la carte (1953), Adam und Eva (1954), Dolce Vita (1960), European Rendez-vous (1962), Expo – Impo (1963) un Lachende Souvenirs (1968/69). In dr 1950er un 1960er Johr hän d Geiler un dr Morath zue dr wiichtigschte Schwyzer Kabarettischte*ne gheert. D Täxt gschriibe hän unter anderen dr Charles Ferdinand Vaucher, dr Fridolin Tschudi, dr Werner Wollenberger un dr Roman Brodmann, kumpeniert hän dr Werner Kruse, dr Walter Baumgartner, dr Lutz Harteck un dr Tibor Kasics. D Geiler un dr Morath hän ire Brogramm gstaltet mit Pantomime un Groteske. In aim Brogramm hän s bis zue vierzg verschiideni Figuure parodiert. Dur iri Sproochvirtuositeet un wel mer iri Koomik iiberall het chenne verstoh, hän si au usserhalb vum dytschsproochige Ruum chenne ufdrätte. Näbe Dytschland un Eeschtrych hän si au Turnee gmacht dur Holland, Ängland, Israel, d Dirkei un Noord- un Siidamerika.

Syt Aafangs 1960er Johr het si as freii Schaupiileri gschafft, zmaischt in Musical un Boulevardkumedine, unter anderem an dr Komödie Basel (1962 d Katharina Petkoff in Helden vum Bernard Shaw), am Operehuus Züri (1965 d Öffentliche Meinung in Orpheus in der Unterwelt vum Jacques Offenbach) am Bernhard-Theater Züri (unter anderem 1967 d Schweschter Lisbeth in Die Kaktusblüte vu Barillet/Grédys, 1968 d Doris in Verrückte Wahrheiten vum Alan Ayckbourn, 1977 d Huushälteri Berthe in Boeing, Boeing vun Marc Camoletti, 1990 d Mrs. Higgins in My Fair Lady vu Loewe/Lerner), uf Turnee, unter anderem as Jente in Anatevka vum Jerry Bock, un mit dr Schauspiildruppe Züri (1973 d Wohrsaageri in Wir sind noch einmal davongekommen vum Thornton Wilder, 1975 d Rhodippe in Lysistrata vum Aristophanes). Zue ire letschte grooße Erfolg zelle 1986 d Claire Zachanassian in Der Besuch der alten Dame vum Friedrich Dürrenmatt (Freiliechtprodukzioon uf em Bahnhoofblatz im bärnische Eiss, Reschy: Lukas Leuenberger) un 1988 d Duchesse de Crakentorp in La Fille du régiment vum Gaetano Donizetti am Ooperehuus Züri.

Näbe däne Theaterolle het si Rolle in verschiidene Film gspiilt, unter anderem d Phyllis Knightsbridge-Littelton in Der Teufel hat gut lachen vum Kurt Früh (1960) un d Madam in Despair vum Rainer Werner Fassbinder (1978).

• 1940: Verena Stadler
• 1955: Sie und Er
• 1960: Der Teufel hat gut lachen
• 1969: Das Go-Go-Girl vom Blow-Up
• 1972: Heute nacht oder nie
• 1978: Despair
• 1984: Tanzschule Kaiser (TV-Serie)
• 1986: Der Besuch der alten Dame
• 1991: La fille du régiment

• Stefan Koslowski, Tanja Stenzl: Voli Geiler. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 691 f.
• Hansruedi Lerch: Voli Geiler. In: Historisches Lexikon vo dr Schwiiz.

• Voli Geiler in dr Internet Movie Database
• Biografy mit Bild bi cyranos.ch