D Susi Kertes, aigetli Suzanne Kertész, (* 17. Dezämber 1914 z Győr; † 4. Juli 1948 z Hinwil) isch e ungarischi Schauspiileri, wu in dr Schwyz gwiirkt het.

D Susi Kertes het ab 1934 am Max Reinhardt Seminar z Wien Schuspiil gleert. Ire eerscht Engaschmänt het si in dr Saison 1935/36 as Gascht am Schauspiilhuus Züri ghaa. In dr Saison 1936/37 het si deert e fescht Engaschänt ghaa. Si het doo unter anderem unter dr Reschy vum Leopold Lindtberg d Marie Beaumarchais in Clavigo vum Johann Wolfang Goethe, d Ophelia in Hamlet vum William Shakespeare, d Leonore in Die Verschwörung des Fiesco zu Genua vum Friedrich Schiller un d Fanny in Arthur Aronymus und seine Väter vu dr Else Lasker-Schüler gspiilt.

Vu 1937 bis 1940 het d Kertes am Städtebundtheater Biel-Soledurn gspiilt, unter andere d Mariane im Der Geizige vum Molière un d Florence Hill in Weisser Flieder vu dr Georges F. Lennox.

Vu 1940 bis 1946 het si am Stadttheater Lozärn gspiilt. Unter anderem d Julia in Romeo und Julia vum Shakespeare (Reschy: Carl Schneider), d Doña Angela in Dame Kobold vum Caldéron (Reschy: Paul Schill), d Julie in Liliom vum Molnár (Reschy: Hermann Brand), d Elmire im Tartuffe vum Molière, d Angela Borgia in Stuck vum Werner Johannes Guggenheim no dr „Novelle“ vum Conrad Ferdinand Meyer, d Solvejg in Peer Gynt vum Hendrik Ibsen, d Leonore von Este in Torquato Tasso vum Goethe, d Lady Windermere in Lady Windermeres Fächer vum Oscar Wilde un verschiideni Schiller-Rolle, unter anderem d Johanna in Die Jungfrau von Orleans, d Titelroll in Maria Stuart, d Beatrice in Die Braut von Messina, d Elisabeth von Valois in Don Carlos, d Luise in Kabale und Liebe un d Amalia in Die Räuber.

Parallel derzue het si ainzelni Gaschtverpfliichtige ghaa, unter anderem am Städtebundtheater Biel-Solothurn (1942 d Titelroll in Cyprienne vum Victorien Sardou un em Émile de Najac, Reschy: Harald Tauber), am Stadttheater Khuur (1945/46 d Titelroll in Salome vum Oscar Wilde, Reschy: Vasa Hochmann) un ab 1942 au reegelmääßig am Summertheater Winterthur.

No 1946 het si unter anderem in ere Tourneeproduktion in Vagabunden vu dr Juliane Kay (Reschy: Walter Firner) mit em Attila Hörbiger un dr Paula Wessely gspiilt.

Anne 1943 het d Kertes dr Harald Tauber ghyroote. Am 4. Juli 1948 isch s Baar bi me Autouufall deetli veruuglickt.

• Tanja Stenzl: Susi Kertes. In: Andreas Kotte (Hrsg.): Theaterlexikon der Schweiz. Band 2. Chronos, Zürich 2005, ISBN 3-0340-0715-9, S. 988.

• 1940–1948: Briefwechsel mit Alma Mahler (siehe auch Eintrag im WorldCat)
• 1937: Reise nach Zürich, Murten, Lausanne und Fribourg mit Susi Kertes und Grete Heger