De Pirmin isch e Missionar bi de Alemanne gsii und het nebet de Riichenau und em Chlooster Müerbe im Elsiss ono vill anderi Chlööster gründet. Er isch de Schutzhailigi vo de Riichenau, vom Elsiss, vo de Pfalz und ono vo de Stadt Innsbrugg.

D Haimet vom Pirmin isch nöd bikannt, d Quelle seged nu, as er vom „Weste“ choo sai. D Forschig ninnt aa, as er e westgotische Gaistliche gsii sai, wo vor de Araber gflochen sai, wo die afange hend Spanie erobere. Er isch denn Bischof vo Melcis wore, aber wele modern Ort dodemit gmaint isch, isch umstritte, e gueti Woorschiinlichkait het s französische Meaux.

De Sintlaz, e fromme alemannische Adlige, isch uf Melcis choo und het de Pirmin iiglade an Bodesee z choo, well d Mentsche dai de christlich Globe nu schlecht uusüebe tüegid. De Pirmin hett die Uufforderig aagnoo und hett denn vom Sintlaz d Insle Sintlazesouwa (hüt: Riichenau) öberchoo. Die isch aber volle mit Schlange gsii, aber wo de Pirmin uf de Insle glandet isch, sind all Schlange öbers Wasser gfloche.

Ane 724 hend de alemannische Adligi Nebi und de Berchtold em Pirmin de Bsitz vo de Insle bistätigt und mit Understützig vom Karl Martell isch druf abe s Chlooster Riichenau ggründet wore. De alemannisch Herzog Theudebald, wo im Chrieg mit em Karl Martell gstanden isch, het aber ane 727 de Pirmin vertribe.

De Pirmin isch is Elsiss, won er vorem alemannische Herzog sicher gsii isch und het 728 s Chlooster Müerbe ggründet. Er hett lengiri Zitt im Elsiss gwürkt und debii no anderi Chlööster ggründet.

De Pirmin isch em 3. November 753 im von em gründete Chloster Hornbach gstorbe und dai au bigrabe wore.

De Pirmin het je noch Zügnis zee oder zwölf Chlööster ggründet.

• Chlooster Riichenau im Bodesee; a.724
• Chlooster Müerbe im Elsiss; a. 728
• Maursmünster (Marmoutier) im Elsiss
• Neuweiler im Elsiss
• Gengebach i de Ortenau
• Schuttere i de Ortenau; um 750
• Schwarzach bi Rastatt
• Hornbach i de Riiland-Pfalz; a. 742
• Nideraltaich z Bayere
• Pfäfers z Churrätie

 Commons: Sankt Pirmin – Sammlig vo Multimediadateie