D Regula Heller (* 12. Oktober 1928; † 25. Jänner 2014 z Mänidorf) isch e Chauffrau z Mänidorf gsi. Si hät z Mänidorf meder 57 Jaar es Hushaltwaaregschäft gfüert und als Dorforiginal gulte.

D Anna-Regula Heller isch z Humbrächtike uf eme Puurehof ufgwachse. Si hät a de Höchere Töchterschuel vo de Stadt Züri e kaufmännischi Usbildig gmacht. Si hät de Alfred Heller ghürate. Si hät drü Chind gha, zwäi devo sind aber tot uf Wält cho. Die Ee isch aber spöter ufglöst wurde. Im Alter won anderi sich pensioniere lönd, hät si de Paul Marthaler käneglärnt und isch mit im 22 Jaar glückli zäme gsi.

Wärend 57 Jaar hät d Fra Heller a de Chugelgass en Lade für ales gfüert. Aagschribe isch er gsi mit Hushaltware, Iseware, Läderware, Spiilzüg. Zwäi Hüüser wiiter isch es zwäits Gschäft vonere gsi, e Papeterie. Und won de Dosebach zuegange isch, häd si ano das Lokal überna und deet Lampe, Gufere, Räiseartikel und Elektrogrät aapote. Ussert Zässe häts bi de Fra Heller warschindli ales gee. D Chunde händ gsäid, was si bruuchet und für was. Dän isch si hine verschwunde und nach me Ziitli wider fürecho, mäischtens häts si gnau das gha, won de Chund hät wele. Und susch öppis anders, won aber au passet hät. Es isch gmunklet worde, das ires Lager hine no d Stägen uf bis id Wonig ufe gieng. Und wils bi de Fra Heller ales gee häd, häd si au Wärchzüg, Schruube, Dachpappe und Sanitärartikel gha. Denäped sind im Gstell Handtäsche, Erschtauguschtraggete, Batterie, Lampebire oder schiggs Glas vo Härgiswil gstande. Ame Samschtigmorge isch si nöd abecho zum de Lade ufzpschlüüse. Di Aagschtellt hät em Paul Marthaler aaglüted, won si i de Wonig gfunde hät. Si isch i de Nacht gschtorbe. Am Tag vorane hät si no verchauft und am Abig zäme mit em Paul im Schiff Znacht gässe gha.

• Todesaazäig i de Zürisee-Ziitig
• Richi Suter: Ein Dorforiginal hinterlässt eine Lücke. in: Zürisee-Ziitig, 14. Hornig 2014.