E Flusssüsteem (au Flussnetz) bestoot us eme Hauptfluss und alle sine diräkten und indiräkte Nääbeflüss. S Flusssüsteem bechunnt mäistens dr Naame vom Hauptfluss über (zum Bischbil s Flussüsteem vom Rhii oder vom Amur).

Em Gebiet, wo vom Flusssüsteem entwässeret wird, säit mä Iizugsgebiet und sine Gränze Wasserschäide.

D Usbildig und Verzwiigig vo Flusssüsteem isch vo groossem Inträsse für alli Forscher und Entdecker gsi, aber erst im 20. Joorhundert het mä die existierende Flussnetz wüsseschaftlig afo undersueche und iidäile. E Mäilestäi in dr Gschicht vo dr wüsseschaftlige Bedrachdig vo Flusssüsteem isch d Veröffentligung vom Robert Elmer Horton im Joor 1945 gsi.^[1] Dr Horton het d Organisazioon vo Flusssüsteem undersuecht und het e Räije vo Richtlinie ufgstellt, wo as Hortonsches Ordnigssüsteem bekannt worde si.^[2] D Iidäilig, wo hüte verwändet wird, goot uf si Süsteem zrugg, und daas isch in de 1950er Joor vom Arthur Newell Strahler ergänzt worde.^[3] D Bezäichnig vo de äinzelne Grundrissmuster stammt vom Emilie R. Zernitz us em Joor 1932.^[4]

Flusssüsteem wärde noch dr Geometrii vo de Flusslöif, wo drzueghööre, in verschidnigi Haupttüpe iidäilt. Die Tüpe si:^[5]

• s parallele Flussnetz
• s radiale Flussnetz
• s dendritische Flussnetz
• s rächtwingglige Flussnetz
• s spalierartige (appalachische) Flussnetz
• s chaotische Flussnetz

S grösste Flusssüsteem vo Westöiropa isch noch em aktuelle Stand vo dr Forschig wäärend em Duefstand vom Meeresspiegel in dr Iiszit s Flusssüsteem vom Rhii gsi, wo au d Themse und d Seine drzue ghöört häi, und wo wenn s nordische Inlandiis sich gstaut het, über s Gebiet vom Ermelkanal, wo denn droche glääge isch, in Atlantik abgflosse isch.

Noch ere Hüpothese chönnti s grösste Flusssüsteem uf dr Wält en Uramazonas gsi si, wo uf em Superkontinänt Gondwana gflosse isch und wo dä usenanderbroche isch, sich in d Flusssüsteem vom Niger und vom hütige Amazonas ufgspaltet het.

1. ↑ Ahnert 1996, S. 257
2. ↑ R.E. Horton: Erosional development of streams and their drainage basins, hydrophysical approach to quantitative morphoplogy. In: Bulletin of the Geological Society of America. Band 52, 1945, S. 275–370. 
3. ↑ A. Strahler: Quantitative analysis of watershed geomorphology. In: Trabsactions of the American Geophysical Union. Band 38, 1957, S. 913–920. 
4. ↑ E.R. Zernitz: Drainage patterns and their significance. In: Journal of Geology. Band 40, 1932, S. 498–521. 
5. ↑ Ahnert 1996, S. 260f
6. ↑ Anm.: Dr Okavango isch e Binnefluss und versickeret vollständig in dr Kalahariwüesti
7. ↑ D Lengi beziet sich uf e ganz Flusslauf vo dr Kwelle vom North River aa.
8. ↑ D Lengi beziet sich uf e ganz Flusslauf Brahmaputra-Jamuna-Padma-Meghna. S Iizugsgebiet umfasst die drei Flusssüsteem vom Brahmaputra, Ganges und Meghna. D Abflussmängi beziet sich uf e Underlauf vom Meghna, wo dr Abfluss us em Brahmaputra, Ganges und Meghna-Oberlauf veräint.)
9. ↑ D Lengi wird underschiidlig aagee, au mit 2'534 oder 2'573 Kilometer.

• Frank Ahnert: Einführung in die Geomorphologie. 1. Auflage. Verlag Eugen Ulmer, Stuttgart 1996, ISBN 3-8252-8103-5, S. 260 ff. 

• Abbildig vo de Flusssüsteem z Dütschland

Dä Artikel basiert uff ere fräie Übersetzig vum Artikel „Flusssystem“ vu de dütsche Wikipedia. E Liste vu de Autore un Versione isch do z finde.