S Drummeli oder Monsterdrummelkonzärt isch e dradizionelli vorfaasnächtligi Veraastaltig im ene Baasler Saal, in de letschte Joor im Musical Theater Basel. Si wird vom Fasnachts-Comité in de letschte zwäi Wuche vor dr Faasnacht organisiert. S Drummeli bestoot us Ufdritt vo Faasnachtsgligge, wo vo Raamestiggli, das si satiirischi Sketsch, wo vo Schauspiiler ufgfüert wärde, zämmeghalte wärde.

S erst Monstre isch am 26. Februar 1906 vom ene Gomitee, wo us Verdräter vom Groossbaasler Veräin Quodlibet und vom Gläibaasler Wurzegraber-Kämmerli bestande het, in dr Burgvogtei-Halle, em hytige Volggshuus, organisiert worde und wäärend Joore si nume Dambuure und Bloosmuusige ufdräte. 1911 isch s Faasnachtsgomitee gründet worde und s Drummeli isch ins Stadtcasino züüglet und 1914 ins Kiechli. Sit de 1920er Joor het s drei Vorstellige gee und in de 1930 häi au Fraue afo ufdrätte. Wäärend em Zwäite Wältchrieg het s kä Stroossefaasnacht gee und in de Raamestiggli vom Drummeli het s Duo «Dipflischysser und Haimlifaiss» afo si Sämf drzuegee und isch e Däil vo dr Voorstellig bliibe bis zum Ändi vo de 1950er Joor. Vo 1948 aa het s acht Vorstellige gee und vo 1956 aa d Balkonszeene mit em Heer und dr Frau Dr. Gläppersämi, em Frailain Glepfgatter und dr Frau Hibsch. 1962 het s sovil Stammgligge ghaa, ass nüme alli an dr gliiche Uffierig häi chönne ufdrätte und sit denn spiilt jeedi Gligge nume no alli zwäi Joor. Vo 1993 bis 2010 isch s Drummeli denn im Festsaal vo dr Mäss Baasel ufgfiert worde und sit denn im Musical Theater.^[1][2] 2021 hets wäge dr Coronapandemie kai Drummeli gäh. Im näggschte Joor isches denn im glainere Küchlin-Theater an dr Steinevorstadt uffgfüehrt worde. Ab denn isches wieder imene Festsaal vo dr Mäss Basel.^[3]

• Baasler Faasnacht

1. ↑ D Gschicht vom Drummeli uf dr Website vom Faasnachtsgomitee, abgrüeft am 11. Jänner 2014
2. ↑ Geschichte der Basler Fasnacht uf altbasel.ch, abgrüeft am 11. Jänner 2014
3. ↑ D'Gschicht vom Drummeli uff dr Website vom Fasnachtscomité.