D Cathy Sharp isch en amerikanischi Dänzere und Choreografin, wo z Basel ihri äignigi freji Danzgrubbe, s «Cathy Sharp Dance Ensemble» läitet.

D Sharp isch z Nashville, Tennessee (USA), uf d Wält choo. Si isch uf d «North Carolina School of the Arts» gange und het mit em Duncan Noble, Peter Apple, Bill Griffith, Joop Sanders, David Howard, Pauline Koner und dr Sonja Tyven gschafft. Vo 1968 bis 1973 isch si Mitgliid vom «Atlanta Ballet» in Atlanta, Georgia, und vom «Grands Ballets Canadiens» z Montreal gsi. 1973 isch si uf Basel choo, wo si bim Heinz Spoerli sim «Basler Ballett» het afo danze und denn Solistin worden isch. Ihri Interbretazione in neoklassische und modärne Choreografie hai z Basel grossen Erfolg ghaa. Vo 1978 bis 1988 het si d Ballettschuel vom Basler Theater gläitet, het für Opereinszenierige choreografiert und au für anderi Danzgrubbe gschafft.

1991 het si ihri äignigi Danzgrubbe gründet, s «Cathy Sharp Dance Ensemble», wo hüte e grosses Repertuar an neoklassische und zitgenössische Choreografie het. D Sharp het d Choreografii für meh as 20 Stück gmacht. D Danzgrubbe het au Gastchoreografe iiglaade wie d Nicole Caccivio, dr Nils Christe, dr Richard Wherlock, dr Itzik Galili, dr Etienne Frey und d Regina van Berkel. Au Mitgliider vom Ensemble wie dr Duncan Rownes hai afo choreografiere. Sit 2003 goht s Ensemble an Schuele und Studio, zum dr Noochwuggs für dr zitgenössisch Danz z fördere.

D Grubbe het öbbe e halbs Dotzed Dänzerinne und Dänzer us dr Schwiz und us em Usland. S «Cathy Sharp Dance Ensemble» macht Turneä im Usland und isch under anderem scho z Australie, in de Vereinigte Staate, in dr Tschechische Republik und z Irland gsi.

D Cathy Sharp isch au Gastdozäntin an dr berüehmte «Rotterdamse Dansacademie» und an dr «Shawbrook School of Dance» z Legan in Irland. 2005 und 2007 isch si Schürimitgliid bim Prix-de-Lausanne gsi. Im Novämber 2005 het d Cathy Sharp dr Kulturbriis vo dr Stadt Basel überchoo für ihr hochs künstlerischs Kwalitetsbewusstsii und ihre Iisatz für e zitgenössisch Danz und siini Vermiddlig uf regionaler, nazionaler und internazionaler Ebeni, wie s dr Basler Regierigsroot usdruggt het.^[1]

• Cathy Sharp Dance Ensemble, ugfrüeft am 16.9.2011
• Medienmitteilungen des Kantons Basel-Stadt: «Feierliche Übergabe des Kulturpreises 2005 der Stadt Basel», ugfrüeft am 16.9.2011

1. ↑ Regierungsrat - Medienmitteilung vom 13.09.2005: «Der Basler Kulturpreis 2005 geht an Cathy Sharp», ugfrüeft am 16.9.2011