Dr hailig Anterus (au Anteros, * z Griecheland; † 3. Jänner 236 z Rom) isch vum Novämber 235 bis Jänner 236 Bischof vu Rom gsii. Är isch dr Noofilger vum Pontianus gsii, wu zämme mit em Gegepapscht Hippolytus uf Befähl vum Chaisers Maximinus Thrax uf Sardinie deportiert woren isch. Sy Name isch e Latinisierig vum griechische Gott vu dr erwiderete Liebi Anteros.

Noch em Name chennt dr Anteros griechischer Härchumft syy, syni Läbesdate sin gschichtli nit belait, s Pontifikat aber scho. Dr Bischof Anterus isch noch ere sibedägige Sedisvakanz am 21. Novämber 235 gwehlt wore. Iber sy Pontifikat, wu nume ne baar Wuche gangen isch, isch nyt Gsicheret iberliferet. Är giltet as dr erscht historisch gsicheret Amtsinhaber. Noch em um 530 entstandene Liber Pontificalis soll er Märtyrerakte gsammlet haa, doderfir sei er mit em Dod bstroft wore. Dr Dod as Märtyrer, wu au zue dr Hailigsprächig gfiert het, isch historisch nit belegbar. Är isch, as erscht Oberhaupt vu dr remisch-katholische Chilchen in dr Calixtus-Katakombe z Rom bstattet wore. S Grab isch anne 1854 widerentdeckt wore. Gedänkdäg sin dr 3. Jänner (katholisch) un 5. Augschte (orthodox).

In dr Darstellig wird er mit eme Papschtgewand uusgstattet un as Attribut wären em d Tiara un dr Chrystab mit zwee oder drei Querbalke zuegornet.

• Friedrich Wilhelm Bautz: ANTEROS, Papst. In: Biographisch-Bibliographisches Kirchenlexikon (BBKL). Band 1, Hamm 1975, Sp. 189.
• Thomas Shahan: Pope St. Anterus. In: Catholic Encyclopedia, Band 1, Robert Appleton Company, New York 1907 (änglisch)
• Lexikon der Heiligen, Weltbild Verlag, Augsburg, 2007, ISBN 3-8289-4980-0

 Commons: Anterus – Sammlig vo Multimediadateie

• Gsamtwärch vu Migne Patrologia Latina mit Inhaltsverzeichnis

Dä Artikel basiert uff ere fräie Übersetzig vu dere Version vum Artikel „Anterus“ vu de dütsche Wikipedia. E Liste vu de Autore un Versione isch do z finde.