Zwjazkowy kraj

Zwjazkowy kraj je dźělny stat federatiwneje republiki. W Europje eksistuja tajke zwjazkowe kraje pod tutym mjenom jenož w Němskej, hdźež je jich šěsnaće a w Awstriskej, hdźež maja dźewjeć zwjazkowych krajow.

Zwjazkowy kraj ma samostatne krajne knježerstwo a krajny sejm, kotryž ma swoje sydło w krajnej stolicy.

W někotrych krajach wužiwaja so hinaše terminusy za dźělne staty. W Zjednoćenych statach Ameriki so wužiwa stat a w Šwicarskej kanton. W Belgiskej a Italskej mjenuja so dźělne jednotki stata region, ale w Ruskej subjekty, pola kotrychž su rozdźělne staflowanje po stopjenju awtonomije. W Kanadźe so rozeznawaja prowincy a teritorije.

Němska ma slědowace zwjazkowe kraje. Kóždy kraj ma – wotwisnje wot ličby wobydlerjow – wěstu ličbu reprezentantow w zwjazkowej radźe.

• Badensko-Württembergska
• Bayerska
• Berlin
• Braniborska
• Bremen
• Delnja Sakska
• Durinska
• Hamburg
• Hessenska
• Mecklenburgsko-Předpomorska
• Porynsko-Pfalca
• Posaarska
• Sakska
• Saksko-Anhaltska
• Schleswigsko-Holsteinska
• Sewjerorynsko-Westfalska

Awstriska ma slědowace zwjazkowe kraje:

• Delnjoawstriska
• Hornjoawstriska
• Hrodowska
• Korutanska
• Salzburgska
• Štyrska
• Tirol
• Vorarlberg
• Wien