eo Supra Ŝvabio

Supra Ŝvabio
Historia regiono
pejzaĝo, regiono [+]
Lando	Germanio
Supra Ŝvabio (Tero)
	v • d • r

Supra Ŝvabio (germane Oberschwaben [Obaŝvabn] aŭ Schwäbisches Oberland [ŜVEbiŝes Obalant]) estas historia regiono en sudokcidenta Germanio, kiu estas parto de la pli larĝa regiono Ŝvabio. Norda limo estas suda rando de la mezalta montaro Schwäbische Alb (Ŝvaba Ĵuraso), formita per la valo de la rivero Danubo, sude la Bodenlago kaj oriente tradicie la rivero Lech: pli granda okcidenta parto de tiu triangulo apartenas al la federacia lando Baden-Virtembergo, pli eta orienta parto al la federacia lando Bavario. Nuntempe iuj fontoj (ekzemple la germanlingva enciklopedio Brockhaus de 1991) limigas la regionon al nur la okcidenta parto, kio signifus ke la rivero Iller, kiu tie konsistigas la landan limon inter Baden-Virtembergo kaj Bavario, estus la orienta limigo de la regiono^[1]

La historia regiono Supra Ŝvabio en la eŭropa mezepoko estis grava parto de la en 911 fondita duklando Ŝvabio, apartenanta al la Orientfranka imperio. Post ties disfalo fine de la rega epoko de la nobela dinastio Ŝtaŭfoj en 1283, grandaj partoj de Supra Ŝvabio ĝis la komenco de la 19-a jarcento apartenis al Antaŭa Aŭstrio, kaj tial ofte nomatis "Ŝvaba Aŭstrio" aŭ germanlingve Schwäbisch-Österreich.^[2] La rega teritorio "Ŝvaba Aŭstrio" ne administriĝis el la urbo Ensisheim en Alzaco, kiu kontrolis la reston de Antaŭa Aŭstrio, sed apartenis rekte al la regiona registaro en Innsbruck.

Geografio

Supra Ŝvabio situas en la sudoriento de Baden-Virtembergo kaj la sudokcidento de Bavario. Temas pri montetara pejzaĝo, precipe uzata por agrikulturo. En la valo Schussental la agrikulturon dominas kultivado de lupolo kaj fruktoj, en la aliaj partoj precipe kultivado de greno kaj bredado de bovoj cele al ricevo de bovina lakto.

Referencoj

↑ enciklopedio Brockhaus, 19-a eldono 1991, volumo 16, p. 72.
↑ Franz Quarthal: Als Schwaben von Österreich aus regiert wurde. Zur Geschichte der habsburgischen Besitzungen in Südwestdeutschland ("Kiam Ŝvabio regiĝis el Aŭstrio. Pri la historio de la habsburgaj posedaĵoj en sudokcidenta Germanio"). En: Schönes Schwaben ("bela Ŝvabio") 10/11, 1996 (kajero 6), p. 34–39.

Vidu ankaŭ

Regiono Bodenlago-Supra Ŝvabio

[1] Brockhaus, 19-a eldono 1991, volumo 16, p. 72.

[2] Franz Quarthal: Als Schwaben von Österreich aus regiert wurde. Zur Geschichte der habsburgischen Besitzungen in Südwestdeutschland ("Kiam Ŝvabio regiĝis el Aŭstrio. Pri la historio de la habsburgaj posedaĵoj en sudokcidenta Germanio"). En: Schönes Schwaben ("bela Ŝvabio") 10/11, 1996 (kajero 6), p. 34–39.

[1]

[2]