Los Alpes[1] son una importante cordelera de montes allugaos n'Europa central. La so cume principal ye'l Mont Blanc, con una cimera de 4.810 metros d'altor. Alrodiu de los Alpes —favorecíu por ríos importantes de caudal uniforme y bayuroses tierres pa cautivar— edificóse la importante civilización qu'anguaño conocemos.
Etimoloxía
Nun se sabe ensembre, si foren los celtes, los romanos o los xermanos los que bautizaren los altos picos alpinos, esistiendo delles etimoloxíes dables:
Los pueblos celtes foren unos de los primeros pobladores de la rexón, ya que metanos d'ellí desendolcaren les sos primeres manifestaciones culturales, conocíes como La Tène, enantes d'estendese pel restu d'Europa. Estos pueblos denomaben alpe en xeneral a tou monte escarpáu.
La pallabra Alpes pudo formase a partir d'albos, términu llatín pa definir blanco, o a partir d'alb, términu celta equivalente. Tuvo de ser la eleición d'unos colonos maraviyaos pol color blancu intensu de les cumes nevaes.
Na mitoloxía antigua de los xermanos, Alp yera un espíritu aereu que moraba na cume de los montes más arispies, baxando de xemes en cuando a carenar a les xentes de les poblaciones averaes.
Otra etimoloxía rellaciona la pallabra Alpes col significáu de valle, lo qu'amosaría que cuando foren "bautizaos" con esi nome nun interesaben les cumes, sinón les brañes altes.
Los cuatromiles de los Alpes
Asina como nos Pirineos la elevación de los montes más importantes trespasa los tres mil metros y nel Himalaya los ocho mil, los Alpes desplíquense como una socesión de montes de más de cuatro mil metros.
Ta nidio que'l so númberu pue cimblar en función de los criterios colos que se determine si una elevación u otra ye una cume independiente o non. Sicasí, considérase qu'hai unes 67 cumes principales o más carauterístiques que trespasen esta altura, concentraes nos seutores central y occidental principalmente. Una rellación más aceutada ye la siguiente, con repartu por macizos d'este a oeste.