Dr Verdraag vom Umar (Arabisch شروط عمر oder عهد عمر oder عقد عمر), isch en apokrüfs Abkomme zwüsche de Muslim und de Christe vo äntwääder Sürie, Mesopotamie oder Jerusalem. Im Lauf vo dr Zit het er e kanonische Status in dr islamische Rächtssprächig überchoo. Es git e baar Wersioone vom Verdraag, wo sich vo dr Struktuur und de Bedingige us vonenander underschäide. Dr Pakt wird mäistens im zwäite Kalif Umar ibn al-Chattab zuegschriibe, es git aber Historiker wo dängge, ass vom umayyadische Kalif Umar II. d Reed sig.

Im Verdraag het s e Liste vo Rächt und vor allem Iischränkige, wo für d Nid-Muslim gälte. Wenn e Nid-Muslim sich draa haltet, denn si si Person, si Familie und si Bsitz gschützt. Noch em islamische Gleerte Ibn Taymiyya, wo dr Verdraag as authentisch aagluegt het, chönne sich d Dhimmi vom Verdraag vom Umar befreije und dr gliich Status wie d Muslim überchoo, wenn si in dr Armee vom islamische Staat diene und zämme mit de Muslim kämpfe.^[1]

Zu de Iischränkige, wo d Dhimmi häi müesse folge, häi under anderem ghöört, ass si käni Hüüser wurde baue, wo hööcher si as die vo de Muslim oder ass si nid uf Säddel wurde ridde, ass si niemer wurde bekeere und ass si käni nöije Sakralgeböid wurde baue und alti nid wurde repariere. Und für dass d Muslime si liicht chönne identifiziere: ass si sich nid wie d Muslim wurde aazie, ass si bsundrigi Gürtel wurde aahaa und ass si d Hoor über dr Stirne wurde churz abschniide.

1. ↑ Michael Ipgrave: Justice and Rights: Christian and Muslim Perspectives. Georgetown University Press 2009, ISBN 1589017226

Dr Verdraag vom Umar uf wikisource (änglisch)

Dä Artikel basiert uff ere fräie Übersetzig vum Artikel „Pact_of_Umar“ vu de änglische Wikipedia. E Liste vu de Autore un Versione isch do z finde.